康原蹛彰化，我徛踮台中，兩个人會使講是隔壁親家，所以定定會佇一寡文化機關、學校舉辦的文學活動相拄，像文學營、文學獎評審佮頒獎典禮、開幕記者會、新冊發表會、演講……等，抑是文友的聚會，差不多攏會鬥陣。

捌康原的朋友攏知影伊是台語童謠、俗語的高手，不只對傳統的了解誠深入，幾十年來伊嘛創作出濟濟的歌謠作品，所以一粒頭殼若親像攜帶式的點唱機咧，伊會斟酌現場的氣氛佮狀況，唱一、兩塊逐家熟似閣生份（意思是聽起來誠親切，但是家己攏袂曉唱）的歌謠。一般來講，文學活動總是比較靜態，比較閉思，比較嚴肅，毋過只要有康原在場，氣氛絕對是鬧熱滾滾，袂輸是台語唸歌的小型發表會。

康原的創作量大閣多元，到目前為止已經出版了八十偌本各種的冊矣，基本的文類像詩、散文，伊的詩華語、台語攏有，台語閣分一般詩作佮囡仔詩。康原對地方文史、民間信仰嘛誠有研究，所以伊也寫足濟本報導文學，報導文學不比一般的文學創作，會使覕佇冊房寫稿就好，彼是愛跤踏實地去現場田野調查的，我共算算咧，康原的報導文學著作有十偌本遐濟，可見伊的行動力有偌驚人。康原的作品內底有大部分作家攏無的文類，彼就是鄉志，伊捌參與彰化縣芳苑鄉、台中縣烏日鄉的鄉志撰寫，展現出伊的地方文史功力。

康原閣有一項特別的著作，就是佮藝術家的共同創作，合作的對象誠多元，有音樂家施福珍、攝影家許蒼澤、雕塑家余燈銓、畫家施並錫……，舊年（2020）和攝影家郭澄芳做伙出版了《台灣水塔地景風貌》，佇台灣你若看對窗仔外出去，厝頂就全水塔，這个誠本土、常民的題材進前佇國藝會的藝文出版補助審查的時，得著全數評審委員的肯定。

這擺，康原合作的對象是攝影家許萬八，延續著頂一本《台灣水塔地景風貌》台語詩配合攝影的形式，主題換做台灣的海岸，詩集名為《臺灣島‧海岸詩》。

台灣是歐亞大陸板塊和菲律賓板塊相激產生了造山運動所形成的，不只有豐富多變的懸山地形，本島的海岸線就有1200公里，若加上外島就超過1500公里矣，免講嘛知影誠迷人，尤其是許萬八的攝影色彩飽滇，有的若油畫，有的像粉彩，艷麗之中摻著奔放的熱情，敢若共海岸幔一條浪漫的絲仔巾。

面對遮爾仔媠的景緻，咱來看康原是按怎發揮伊的台語詩作：

　人佮人的  交流

　愛圓滿  人生的難關

　攏會平安度過

　關渡的人

　看橋跤的水恬恬

　流過  淡水河

    　（橋邊交流道）

交流道大部分攏是圓的造形，會使用交流道就是車，車是人咧駛的，這首就因此聯結到人和人的互動交流，重要的是愛圓滿，像交流道圓的造形，圓滿才是渡過難關的關鍵。

仝款這種人際和諧的思想猶有：

　人佮人做伙  愛和平

　島上的  涼亭

　清風  吹過來

　　（亭仔跤）

寫和平島的涼亭，巧妙應用地名「和平」，點出人佮人的做伙若是會當和平鬥陣，人生才會坐踮涼亭內，閣再有清風吹過來。

因為是海岸，所以這本詩集內底寫著四个所在的燈塔，分別是鼻頭角、墾丁、高雄旗津、三貂嶺，佇這四首詩作內，除了旗津彼首，其他三首攏共燈塔比喻做「目睭」，「佇鼻頭／裝上目睭」（鼻頭角燈塔），「守佇墾丁烏暗暝的／燈塔  是南台灣海岸的／目睭  透出關懷世間的眼神」（墾丁燈塔），「福爾摩沙上東爿  三貂嶺／燈塔對大海  談情說愛／海邊看守  台灣的目睭」（三貂嶺燈塔），目睭是予世界現形的鏡頭，是看著危險、交流表達感情上蓋直接快速的接收器。

這本詩集猶有予人驚喜的一輯《生態之歌》，記錄著各種鳥仔，嘛有花鮡、砂馬仔（招潮蟹）等，展現出台灣海岸活跳跳的生態現象。

康原和許萬八聯手，予咱掀開這本冊的時，影像配歌詩，烏白的文字配彩色的攝影，無聲的文字變有聲的海湧，風講古、雲穿衫、鳥仔唱歌。

我佇2009年和2019年兩度、各一年擔任彰化師範大學的駐校作家，期間閣逐年攏固定去為專業學程授課，會使講三不五時落咧走彰化，逐遍對74號快速道路進入彰化彰南路，中途我就想著，康原就是蹛佇倒爿的山坡頂啊，想到遮，伊的台語唸謠自然就飛入我的車內，十外冬來，我竟然一直攏佮康原的唸謠相閃身。